ਪਟਿਆਲਾ, 15 ਅਪ੍ਰੈਲ - ਪਟਿਆਲਾ ਲੋਕੋਮੋਟਿਵ ਵਰਕਸ ਵੱਲੋਂ ਆਯੋਜਿਤ ਛੇ ਦਿਨ ਚੱਲਣ ਵਾਲੀ 67ਵੀਂ ਆਲ ਇੰਡੀਆ ਰੇਲਵੇ ਪੁਰਸ਼ ਕ੍ਰਿਕਟ ਚੈਂਪੀਅਨਸ਼ਿਪ 2023-24 ਦੀ ਸ਼ੁਰੂਆਤ ਅੱਜ ਇਥੇ ਪਟਿਆਲਾ ਲੋਕੋਮੋਟਿਵ ਵਰਕਸ (ਪੀ ਐਲ ਡਬਲਿਊ ) ਦੇ ਕ੍ਰਿਕਟ ਸਟੇਡੀਅਮ ਵਿਖੇ ਨਾਕਆਊਟ ਮੈਚਾਂ ਨਾਲ ਹੋਈ। ਭਾਰਤੀ ਰੇਲਵੇ ਦੀਆਂ 28 ਟੀਮਾਂ ਵਿੱਚੋਂ ਅੱਠ ਟੀਮਾਂ ਨੇ ਪੀ ਐਲ ਡਬਲਿਊ ਵਿੱਚ ਖੇਡੇ ਜਾਣ ਵਾਲੇ  ਮੈਚਾਂ ਲਈ ਕੁਆਲੀਫਾਈ ਕੀਤਾ ਹੈ। 
ਪ੍ਰਮੋਦ ਕੁਮਾਰ, ਪ੍ਰਿੰਸੀਪਲ ਚੀਫ਼ ਪ੍ਰਬੰਧਕੀ ਅਫ਼ਸਰ (ਪੀ.ਸੀ.ਏ.ਓ.) ਪੀ.ਐਲ.ਡਬਲਿਊ. ਨੇ ਇਸ ਮੌਕੇ ਮੁੱਖ ਮਹਿਮਾਨ ਵਜੋਂ ਸ਼ਿਰਕਤ ਕਰਦਿਆਂ ਚੈਂਪੀਅਨਸ਼ਿਪ ਦਾ ਉਦਘਾਟਨ ਕੀਤਾ। ਉਨ੍ਹਾਂ ਹੋਰ ਅਧਿਕਾਰੀਆਂ ਦੇ ਨਾਲ ਪੀ.ਐੱਲ.ਡਬਲਿਊ. ਕ੍ਰਿਕਟ ਸਟੇਡੀਅਮ ਵਿਖੇ ਉੱਤਰੀ ਪੱਛਮੀ ਰੇਲਵੇ ਅਤੇ ਮੈਟਰੋ ਰੇਲਵੇ ਕੋਲਕਾਤਾ ਵਿਚਕਾਰ ਪਹਿਲੇ ਮੈਚ ਦੇ ਖਿਡਾਰੀਆਂ ਨਾਲ ਜਾਣ-ਪਛਾਣ ਕੀਤੀ। ਪ੍ਰਮੋਦ ਕੁਮਾਰ ਨੇ ਟਾਸ ਦਾ ਸੰਚਾਲਨ ਵੀ ਕੀਤਾ| ਜਿਸ ਨੂੰ ਮੈਟਰੋ ਰੇਲਵੇ ਨੇ ਜਿੱਤ ਕੇ ਪਹਿਲਾਂ ਗੇਂਦਬਾਜ਼ੀ ਕਰਨ ਦਾ ਫੈਸਲਾ ਕੀਤਾ। ਉੱਤਰੀ ਪੱਛਮੀ ਰੇਲਵੇ ਨੇ 46.4 ਓਵਰਾਂ ਵਿੱਚ 10 ਵਿਕਟਾਂ 'ਤੇ 223 ਦੌੜਾਂ ਬਣਾਈਆਂ, ਜਿਸ ਵਿੱਚ ਸਭ ਤੋਂ ਵੱਧ ਸਕੋਰ ਸੂਰਿਆ ਅਤੇ ਅੰਸ਼ੁਲ ਨੇ ਕ੍ਰਮਵਾਰ 58 ਗੇਂਦਾਂ ਵਿੱਚ 52 ਅਤੇ 46 ਗੇਂਦਾਂ ਵਿੱਚ 42 ਦੌੜਾਂ ਬਣਾਈਆਂ। ਮੈਟਰੋ ਰੇਲਵੇ ਦੇ ਅਮਿਤ ਕੁਇਲਾ ਨੇ ਤਿੰਨ ਵਿਕਟਾਂ ਲਈਆਂ। ਜਵਾਬ 'ਚ ਮੈਟਰੋ ਰੇਲਵੇ ਕੋਲਕਾਤਾ ਨੇ ਟੀਚੇ ਦਾ ਪਿੱਛਾ ਕਰਦਿਆਂ ਪੰਜ ਵਿਕਟਾਂ 'ਤੇ 228 ਦੌੜਾਂ ਬਣਾ ਕੇ ਮੈਚ 5 ਵਿਕਟਾਂ ਨਾਲ ਜਿੱਤ ਲਿਆ। ਮੈਟਰੋ ਰੇਲਵੇ ਲਈ ਸਭ ਤੋਂ ਵੱਧ ਸਕੋਰਰ ਅਰਿੰਦਮ ਰਿਹਾ, ਜਿਸ ਨੇ 119 ਗੇਂਦਾਂ ਵਿੱਚ 83 ਦੌੜਾਂ ਬਣਾਈਆਂ ਅਤੇ ਨਾਟ ਆਊਟ ਰਿਹਾ। ਉੱਤਰੀ ਪੱਛਮੀ ਰੇਲਵੇ ਵੱਲੋਂ ਸੀ.ਪੀ. ਜੱਟ ਅਤੇ ਮੌਂਟੀ ਨੇ 2-2 ਵਿਕਟਾਂ ਹਾਸਲ ਕੀਤੀਆਂ। 
ਪੱਛਮੀ ਰੇਲਵੇ ਅਤੇ ਪੂਰਬੀ ਰੇਲਵੇ ਵਿਚਾਲੇ ਦੂਜੇ ਮੈਚ ਵਿੱਚ ਪੱਛਮੀ ਰੇਲਵੇ ਨੇ 50 ਓਵਰਾਂ ਵਿੱਚ ਨੌਂ ਵਿਕਟਾਂ ਦੇ ਨੁਕਸਾਨ ’ਤੇ 285 ਦੌੜਾਂ ਦਾ ਟੀਚਾ ਰੱਖਿਆ। ਪੱਛਮੀ ਰੇਲਵੇ ਦੇ ਸਮਰਥ ਅਤੇ ਰੈਕਸਲੀ ਨੇ ਕ੍ਰਮਵਾਰ 71 ਗੇਂਦਾਂ ਵਿੱਚ 87 ਅਤੇ 41 ਗੇਂਦਾਂ ਵਿੱਚ 35 ਦੌੜਾਂ ਬਣਾਈਆਂ। ਈਸਟਰਨ ਰੇਲਵੇ ਦੇ ਅਰਿਜੀਤ ਨੇ 3 ਵਿਕਟਾਂ ਲਈਆਂ। ਪੂਰਬੀ ਰੇਲਵੇ ਨੇ ਟੀਚੇ ਦਾ ਸਫਲਤਾਪੂਰਵਕ ਪਿੱਛਾ ਕਰਦਿਆਂ ਮੈਚ ਛੇ ਵਿਕਟਾਂ ਨਾਲ ਜਿੱਤ ਲਿਆ।