ਊਨਾ, 5 ਮਾਰਚ - ਮੰਗਲਵਾਰ 5 ਮਾਰਚ ਨੂੰ ਆਈ.ਟੀ.ਆਈ ਊਨਾ ਵਿਖੇ ਨੌਕਰੀ ਮੇਲਾ ਲਗਾਇਆ ਗਿਆ | ਰੁਜ਼ਗਾਰ ਮੇਲੇ ਵਿੱਚ ਮੈਸਰਜ਼ ਟਾਟਾ ਮੋਟਰਜ਼ ਲਿਮਟਿਡ ਸਾਨੰਦ ਜੀਆਈਡੀਸੀ ਅਹਿਮਦਾਬਾਦ, ਮੈਸਰਜ਼ ਟੀਵੀਐਸ ਮੋਟਰਜ਼ ਲਿਮਟਿਡ ਨਾਲਾਗੜ੍ਹ, ਮੈਸਰਜ਼ ਜੀਐਮਪੀ ਪ੍ਰਾਈਵੇਟ ਲਿਮਟਿਡ ਮੁਹਾਲੀ, ਮੈਸਰਜ਼ ਜੀਐਸਕੇ ਇੰਟਰ ਨੈਸ਼ਨਲ ਪ੍ਰਾਈਵੇਟ ਲਿਮਟਿਡ ਝਰਮਜ਼ਰੀ ਬੱਦੀ ਅਤੇ ਮੈਸਰਜ਼  ਲਿਵ ਗਾਰਡ ਲਿਮਟਿਡ ਮੁਬਾਰਿਕਪੁਰ ਨੇ ਕੈਂਪਸ ਡਰਾਈਵ ਵਿੱਚ ਭਾਗ ਲਿਆ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਆਈ.ਟੀ.ਆਈ ਦੇ ਪਿ੍ੰਸੀਪਲ ਈ ਅੰਸ਼ੁਲ ਭਾਰਦਵਾਜ ਨੇ ਦੱਸਿਆ ਕਿ ਨੌਕਰੀ ਮੇਲੇ ਵਿਚ ਵੱਖ-ਵੱਖ ਆਈ.ਟੀ.ਆਈਜ਼ ਦੇ 46 ਸਿਖਿਆਰਥੀਆਂ ਨੇ ਭਾਗ ਲਿਆ, ਜਿਨ੍ਹਾਂ ਵਿਚੋਂ 28 ਸਿਖਿਆਰਥੀਆਂ ਦੀ ਚੋਣ ਕੰਪਨੀਆਂ ਵਲੋਂ ਰੈਗੂਲਰ ਅਤੇ ਐਨ.ਏ.ਪੀ.ਐਸ. ਦੇ ਤਹਿਤ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਕੰਪਨੀਆਂ ਨੇ NAPS ਸਿਖਿਆਰਥੀਆਂ ਨੂੰ 12,800 ਰੁਪਏ, ਇੱਕ ਅਤੇ ਦੋ ਸਾਲ ਦਾ ਤਜਰਬਾ ਰੱਖਣ ਵਾਲੇ ਸਿਖਿਆਰਥੀਆਂ ਨੂੰ 16,500 ਰੁਪਏ ਅਤੇ ਤਿੰਨ ਸਾਲਾਂ ਦਾ ਤਜਰਬਾ ਰੱਖਣ ਵਾਲੇ ਸਿਖਿਆਰਥੀਆਂ ਨੂੰ 17,000 ਰੁਪਏ ਦੀ ਮਹੀਨਾਵਾਰ ਤਨਖਾਹ ਦੀ ਪੇਸ਼ਕਸ਼ ਕੀਤੀ ਹੈ।