ਐਸ.ਏ.ਐਸ. ਨਗਰ, 30 ਅਗਸਤ (ਸ.ਬ.) ਦਫ਼ਤਰ ਜ਼ਿਲ੍ਹਾ ਭਾਸ਼ਾ ਅਫ਼ਸਰ, ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ (ਮੁਹਾਲੀ) ਅਤੇ ਕਵੀ ਮੰਚ (ਰਜਿ.) ਮੁਹਾਲੀ ਵੱਲੋਂ ਗੁਰਪ੍ਰੀਤ ਕੌਰ ਸੈਣੀ ਦੀ ਪੁਸਤਕ ‘ਅੱਖਰ ਅੱਖਰ ਲੋਅ’ ਦਾ ਲੋਕ ਅਰਪਣ ਅਤੇ ਵਿਚਾਰ ਚਰਚਾ ਸਮਾਰੋਹ ਆਯੋਜਿਤ ਕੀਤਾ ਗਿਆ। ਜ਼ਿਲ੍ਹਾ ਭਾਸ਼ਾ ਅਫ਼ਸਰ ਡਾ. ਦਵਿੰਦਰ ਸਿੰਘ ਬੋਹਾ ਵਲੋਂ ਪ੍ਰਧਾਨਗੀ ਮੰਡਲ, ਸਾਹਿਤਕਾਰਾਂ ਅਤੇ ਪਤਵੰਤੇ ਸੱਜਣਾਂ ਨੂੰ ‘ਜੀ ਆਇਆਂ ਨੂੰ’ ਕਹਿੰਦਿਆਂ ਗੁਰਪ੍ਰੀਤ ਕੌਰ ਸੈਣੀ ਦੀ ਪੁਸਤਕ ‘ਅੱਖਰ ਅੱਖਰ ਲੋਅ’ ਬਾਰੇ ਗੱਲ ਕਰਦਿਆਂ ਕਿਹਾ ਕਿ ਇਸ ਵਿਚਲੀਆਂ ਸਾਰੀਆਂ ਹੀ ਗ਼ਜ਼ਲਾਂ ਕਾਬਿਲ-ਏ-ਤਾਰੀਫ਼ ਹਨ ਕਿਉਂਕਿ ਲੇਖਿਕਾ ਨੇ ਨਾਰੀ ਮਨ ਦੀਆਂ ਅਸੀਮ ਡੂੰਘਾਣਾਂ ਅਤੇ ਸੱਧਰਾਂ ਨੂੰ ਇਨ੍ਹਾਂ ਵਿੱਚ ਚਿਤਰਿਆ ਹੈ। ਉਹਨਾਂ ਇਸ ਮੌਕੇ ਉਹਨਾਂ ਭਾਸ਼ਾ ਵਿਭਾਗ ਪੰਜਾਬ ਵਲੋਂ ਕੀਤੇ ਜਾ ਰਹੇ ਕੰਮਾਂ ਅਤੇ ਜ਼ਿਲ੍ਹਾ ਭਾਸ਼ਾ ਦਫ਼ਤਰ ਮੁਹਾਲੀ ਦੀਆਂ ਪ੍ਰਾਪਤੀਆਂ ਤੋਂ ਵੀ ਜਾਣੂ ਕਰਵਾਇਆ। ਸਮਾਗਮ ਦੀ ਪ੍ਰਧਾਨਗੀ ਕਰ ਰਹੇ ਉੱਘੇ ਗ਼ਜ਼ਲਗੋ ਸਿਰੀ ਰਾਮ ਅਰਸ਼ ਨੇ ਪੁਸਤਕ ਬਾਰੇ ਕਿਹਾ ਕਿ ਗੁਰਪ੍ਰੀਤ ਦੀ ਗ਼ਜ਼ਲ ਔਰਤ ਦੀ ਤਾਕਤ ਬਾਰੇ ਗੱਲ ਕਰਦੀ ਹੈ ਅਤੇ ਇਹ ਔਰਤ ਨੂੰ ਕਿਤੇ ਵੀ ਗ਼ੈਰਹਾਜ਼ਰ ਨਹੀਂ ਹੋਣ ਦਿੰਦੀ। ਪ੍ਰਧਾਨਗੀ ਮੰਡਲ ਵਿੱਚ ਸ਼ਾਮਲ ਦੀਪਕ ਸ਼ਰਮਾ ਚਨਾਰਥਲ ਨੇ ਪੁਸਤਕ ਬਾਰੇ ਕਿਹਾ ਕਿ ਇਸ ਦੇ ਨਾਮ ਤੋਂ ਹੀ ਸਪਸ਼ਟ ਹੈ ਕਿ ਇਹ ਪੁਸਤਕ ਸਮਕਾਲੀਨ ਔਰਤ ਦੀ ਦਸ਼ਾ ਅਤੇ ਦਿਸ਼ਾ ਦੀ ਮੁਕੰਮਲ ਤਸਵੀਰਕਸ਼ੀ ਹੈ। ਪਰਚਾ ਲੇਖਕ ਬਲਬੀਰ ਸਿੰਘ ਸੈਣੀ ਨੇ ਪ੍ਰਭਾਵਪੂਰਨ ਪਰਚਾ ਪੜ੍ਹਦਿਆਂ ਕਿਹਾ ਕਿ ਇਹ ਗ਼ਜ਼ਲ ਸੰਗ੍ਰਹਿ ਨਿਰਾਰਥਕਤਾ ਤੋਂ ਸਾਰਥਕਤਾ ਦਾ ਆਲਮ ਸਿਰਜਦਾ ਹੈ। ਕਵੀ ਮੰਚ ਦੇ ਪ੍ਰਧਾਨ ਭਗਤ ਰਾਮ ਰੰਗਾੜਾ ਲੈ ਕਿਹਾ ਕਿ ਇਹ ਗ਼ਜ਼ਲ-ਸੰਗ੍ਰਹਿ ਸਮਾਜ ਨੂੰ ਅਗਵਾਈ ਦੇਣ ਵਾਲੇ ਵੰਨ-ਸੁਵੰਨੇ ਵਿਸ਼ਿਆਂ ਨਾਲ ਭਰਪੂਰ ਹੈ। ਆਪਣੇ ਪਰਚੇ ਵਿੱਚ ਨਵਾਬ ਫ਼ੈਸਲ ਖ਼ਾਨ ਨੇ ਕਿਹਾ ਕਿ ਇਸ ਪੁਸਤਕ ਵਿੱਚ ਚਿੰਤਨ ਅਤੇ ਬੌਧਿਕਤਾ ਦੇ ਅੰਸ਼ ਭਰਪੂਰ ਹਨ। ਲੇਖਿਕਾ ਗੁਰਪ੍ਰੀਤ ਕੌਰ ਸੈਣੀ ਵੱਲੋਂ ਆਪਣੀ ਸਿਰਜਣ ਪ੍ਰਕਿਰਿਆ ਬਾਰੇ ਆਖਿਆ ਗਿਆ ਕਿ ਜ਼ਿੰਦਗੀ ਦੀਆਂ ਹਕੀਕਤਾਂ ਅਤੇ ਤਲਖ਼ ਦੁਸ਼ਵਾਰੀਆਂ ਭਾਵੇਂ ਮੈਂ ਨਿੱਜੀ ਪੱਧਰ ਤੇ ਨਹੀਂ ਹੰਢਾਈਆਂ ਪਰ ਸਮਾਜ ਵਿਚ ਵਾਪਰਦੇ ਅਨਿਆ ਨੂੰ ਮੈਂ ਅੱਖੀਂ ਵੇਖਿਆ ਹੈ। ਇਸ ਕਰਕੇ ਸਮਾਜ ਵਿਚਲੇ ਦਰਦ ਅਤੇ ਸੱਚ ਨਾਲ ਖੜ੍ਹਨ ਦੀ ਸਾਹਿਤ ਮੈਨੂੰ ਹਿੰਮਤ ਬਖ਼ਸ਼ਦਾ ਹੈ। ਮੈਡਮ ਸਤਵੀਰ ਕੌਰ, ਪ੍ਰੋ. ਦਿਲਬਾਗ ਸਿੰਘ ਅਤੇ ਰਣਜੋਧ ਰਾਣਾ ਵੱਲੋਂ ਵੀ ਵਿਚਾਰ ਚਰਚਾ ਵਿਚ ਹਿੱਸਾ ਲੈਂਦਿਆਂ ਪੁਸਤਕ ਦੀ ਬਣਤਰ ਅਤੇ ਬੁਣਤਰ ਬਾਰੇ ਆਪਣੇ ਵਿਚਾਰ ਰੱਖੇ ਗਏ। ਇਨ੍ਹਾਂ ਤੋਂ ਇਲਾਵਾ ਬਲਵਿੰਦਰ ਸਿੰਘ ਢਿੱਲੋਂ, ਜਗਤਾਰ ਸਿੰਘ ਜੋਗ, ਧਿਆਨ ਸਿੰਘ ਕਾਹਲੋਂ ਅਤੇ ਬਲਦੇਵ ਸਿੰਘ ਪ੍ਰਦੇਸੀ ਵੱਲੋਂ ਹਥਲੇ ਗ਼ਜ਼ਲ-ਸੰਗ੍ਰਹਿ ਵਿੱਚੋਂ ਗ਼ਜ਼ਲਾਂ ਦਾ ਪਾਠ ਕੀਤਾ ਗਿਆ। ਇਸ ਵਿਚਾਰ ਚਰਚਾ ਵਿੱਚ ਪ੍ਰਿੰ. ਬਹਾਦਰ ਸਿੰਘ ਗੋਸਲ, ਕਮਲਜੀਤ ਸਿੰਘ ਬਨਵੈਤ, ਸਰਦਾਰਾ ਸਿੰਘ ਚੀਮਾ, ਜਸਵੀਰ ਗੋਸਲ, ਜਤਿੰਦਰ ਮਲਹੋਤਰਾ, ਮਨਜੀਤਪਾਲ ਸਿੰਘ, ਚਰਨਪਾਲ ਸਿੰਘ, ਜਸਵੀਰ ਸਿੰਘ ਗੜਾਂਗ, ਹਰਦੀਪ ਸਿੰਘ ਲੌਂਗੀਆ, ਜਸਵੰਤ ਸਿੰਘ ਢੀਂਡਸਾ, ਰਘਬੀਰ ਸਿੰਘ, ਡਾ. ਰੇਨੂੰ, ਕਰਮਜੀਤ ਸਿੰਘ ਬੱਗਾ, ਮਨਜੀਤ ਸਿੰਘ, ਜਤਿੰਦਰਪਾਲ ਸਿੰਘ ਅਤੇ ਲਖਵਿੰਦਰ ਸਿੰਘ ਵੱਲੋਂ ਵੀ ਸ਼ਿਰਕਤ ਕੀਤੀ ਗਈ।