ਨਵਾਂਸ਼ਹਿਰ - ਉਪਕਾਰ ਕੋਆਰਡੀਨੇਸ਼ਨ ਸੋਸਾਇਟੀ ਦੀ ਯੁਵਾ ਸ਼ਾਖਾ ਉਪਕਾਰ ਯੁਵਾ ਕਲੱਬ ਵਲੋਂ  ਦੁਆਬਾ ਸਿੱਖ ਨੈਸ਼ਨਲ ਸੀਨੀਅਰ ਸੈਕੰਡਰੀ ਸਕੂਲ ਸਲੋਹ ਰੋਡ ਨਵਾਂਸ਼ਹਿਰ ਵਿਖੇ “ਨਸ਼ਿਆਂ ਦੀ ਬੁਰਾਈ” ਅਤੇ “ਕੰਨਿਆਂ ਭਰੂਣ ਹੱਤਿਆ” ਦੀ ਰੋਕਥਾਮ ਲਈ ਵਿਸ਼ੇਸ਼ ਜਾਗਰੂਕਤਾ ਸੈਮੀਨਾਰ ਆਯੋਜਿਤ ਕੀਤਾ ਗਿਆ। ਜਿਸ ਦੀ ਪ੍ਰਧਾਨਗੀ ਪ੍ਰਿੰਸੀਪਲ ਪਰਵਿੰਦਰ ਸਿੰਘ ਰਾਣਾ, ਉਪਕਾਰ ਦੇ ਪ੍ਰਧਾਨ ਸ੍ਰੀ ਜੇ.ਐਸ.ਗਿੱਦਾ, ਜ: ਸਕੱਤਰ ਮਾਸਟਰ ਨਰਿੰਦਰ ਸਿੰਘ ਭਾਰਟਾ, ਪ੍ਰੈਸ ਸਕੱਤਰ ਦੇਸ ਰਾਜ ਬਾਲੀ, ਉਪਕਾਰ ਯੁਵਾ ਕਲੱਬ ਕੈਸ਼ੀਅਰ ਮੈਡਮ ਸਿਮਰਨਜੀਤ ਕੌਰ ਤੱਖੀ ਤੇ ਉਪਕਾਰ ਯੁਵਾ ਕਲੱਬ ਸਕੱਤਰ ਅਕਰਸ਼ ਬਾਲੀ ਤੇ ਅਧਾਰਿਤ ਪ੍ਰਧਾਨਗੀ ਮੰਡਲ ਵਲੋਂ ਕੀਤੀ ਗਈ। ਇਸ ਮੌਕੇ ਵਿਦਿਆਰਥੀਆਂ ਨੂੰ ਸੰਬੋਧਨ ਕਰਨ ਵਾਲ੍ਹੇ  ਬੁਲਾਰਿਆਂ ਨੇ ਦੋ ਸਮਾਜਿਕ ਬੁਰਾਈਆਂ ਦੇ ਖਤਰਨਾਕ ਨਤੀਜਿਆਂ ਤੇ ਵਿਚਾਰ ਰੱਖੇ ਤੇ ਰੋਕਥਾਮ ਸੁਝਾਅ ਪੇਸ਼ ਕੀਤੇ ਤੇ ਆਖਿਆ ਕਿ ਸਮਾਜਿਕ ਬੁਰਾਈਆਂ ਦੀ ਰੋਕਥਾਮ ਦੋ ਤਰਫਾ ਯਤਨਾਂ ਰਾਹੀਂ ਹੀ ਸੰਭਵ ਹੈ ਇੱਕ ਹੈ ਆਮ ਪਬਲਿਕ ਲਈ ਜਾਗਰੂਕਤਾ ਦੂਜਾ ਹੈ ਅਪਰਾਧ ਫੈਲਾਉਣ ਵਾਲ੍ਹਿਆਂ ਲਈ ਨਿਰਪੱਖ ਕਾਨੂੰਨੀ ਸਖ਼ਤੀ। ਸਮਾਜ ਸੇਵੀ ਸੰਸਥਾਵਾਂ ਮੁੱਖ ਤੌਰ ਤੇ  ਜਾਗਰੂਕਤਾ ਨੂੰ ਸਮਰਪਿਤ  ਹਨ। ਸੈਮੀਨਾਰ ਵਿੱਚ ਬੁਲਾਰਿਆਂ ਨੇ ਇਸ ਗੱਲ ਤੇ ਚਿੰਤਾ ਜ਼ਾਹਰ ਕੀਤੀ ਕਿ ਪ੍ਰਵਾਸ ਦੀ ਪ੍ਰਵਿਰਤੀ ਨਾਲ੍ਹ ਪੰਜਾਬ ਵਿੱਚ ਰੁਜ਼ਗਾਰ ਲਈ ਉਪਲੱਬਧ ਮੌਕਿਆਂ ਪ੍ਰਤੀ ਉਦਾਸੀਨਤਾ ਦੀ ਸਥਿਤੀ ਬਣੀ ਹੋਈ ਹੈ। ਸਰਕਾਰੀ ,ਅਰਧ ਸਰਕਾਰੀ ਤੇ ਪ੍ਰਾਈਵੇਟ ਅਦਾਰਿਆਂ ਵਿੱਚ ਉਪਲੱਬਧ ਅਸਾਮੀਆਂ ਲਈ ਦਰਖਾਸਤਾਂ ਦੇਣੀਆਂ ਚਾਹੀਦੀਆਂ ਹਨ ਜਦਕਿ ਪੰਜਾਬੀ ਖਾਸ ਕਰਕੇ ਦੁਆਬਾ ਏਰੀਆ ਰੋਜ਼ਗਾਰ ਮੌਕਿਆਂ ਪ੍ਰਤੀ ਦਿਲਚਸਪੀ ਤੋਂ ਵਾਂਝਾ ਵਿਖਾਈ ਦੇ ਰਿਹਾ ਹੈ। ਬੁਲਾਰਿਆਂ ਨੇ ਨਸ਼ਿਆਂ ਦੀ ਬੁਰਾਈ ਦੇ ਪਸਾਰ ਪ੍ਰਤੀ ਚਿੰਤਾ ਪ੍ਰਗਟ ਕਰਦਿਆਂ ਨਸ਼ਿਆਂ ਦੀ ਸਪਲਾਈ-ਲਾਈਨ ਨੂੰ ਤੋੜਨ ਦੀ ਲੋੜ ਤੇ ਜੋਰ ਦਿੱਤਾ। ਉਹਨਾਂ ਨੇ ਸਮੂਹ ਮਾਪਿਆਂ ਨੂੰ ਆਪਣੇ ਬੱਚਿਆਂ ਪ੍ਰਤੀ ਚੌਕੰਨੇ ਰਹਿਣ ਦੀ ਅਪੀਲ ਕੀਤੀ ਤੇ ਆਖਿਆ ਕਿ ਭਟਕ ਚੁੱਕੇ ਬੱਚਿਆਂ ਤੇ ਸਖਤੀ ਦੀ ਵਿਜਾਏ ਉਹਨਾਂ ਨਾਲ੍ਹ ਪਿਆਰ ਪ੍ਰਗਟਾਵਾ ਕਰਦਿਆਂ ਇਲਾਜ ਲਈ ਸਮਾਜ ਸੇਵੀ ਸਹਿਯੋਗ ਲੈਣ ਦੇ ਯਤਨ ਕਰਨ। ਇਸ ਮੌਕੇ ਗੁਰਸਿਮਰਨ, ਆਰੀਅਨ ਤੇ ਤਰਨਪ੍ਰੀਤ ਵਿਦਿਆਰਥਣਾਂ ਨੇ ਭਰੂਣ ਹੱਤਿਆ ਤੇ ਨਸ਼ਿਆਂ ਦੀ ਬੁਰਾਈ ਤੋਂ ਰੋਕਥਾਮ ਦਾ ਪ੍ਰਗਟਾਵਾ ਕਰਦੀਆਂ ਰਚਨਾਵਾਂ ਪੇਸ਼ ਕੀਤੀਆਂ। ਇਸ ਮੌਕੇ ਸਕੂਲ  ਵਿੱਚ 12 ਮੈਂਬਰੀ “ਉਪਕਾਰ ਯੁਵਾ ਕਲੱਬ” ਇਕਾਈ ਵੀ ਸਥਾਪਨਾ ਕੀਤੀ ਗਈ। ਉਪਕਾਰ ਵਲੋਂ ਸਾਬਕਾ ਜ: ਸਕੱਤਰ ਸ੍ਰੀ ਬੀਰਬਲ ਤੱਖੀ ,ਮੀਤ ਪ੍ਰਧਾਨ ਮੈਡਮ ਹਰਬੰਸ ਕੌਰ, ਸੁਰਜੀਤ ਕੌਰ ਡੂਲਕੂ, ਬਲਵਿੰਦਰ ਕੌਰ ਬਾਲੀ, ਸ਼ਮਾ ਮਲਹੱਨ, ਸਾਬਕਾ ਪ੍ਰਿੰਸੀਪਲ ਹਰਵਿੰਦਰ ਸਿੰਘ, ਸਟਾਫ ਮੈਂਬਰ ਜਸਕਰਨ ਸਿੰਘ, ਸ੍ਰੀ ਸੁਰਜੀਤ ਸਿੰਘ, ਮੈਡਮ ਮੋਨਾ, ਮੈਡਮ ਕਮਲਜੀਤ ਕੌਰ, ਮੈਡਮ ਸਤਿੰਦਰ ਕੌਰ, ਮੈਡਮ ਪੂਜਾ, ਮੈਡਮ ਮਨਜੀਤ ਕੌਰ,ਮੈਡਮ ਭੂਮੀਕਾ ਨੇ ਕਲੱਬ ਦੀ ਤਰਫੋਂ ਵਿਦਿਆਰਥੀਆਂ ਨੂੰ 15 ਵਿਸ਼ੇਸ਼ ਟਰੈਕ ਸੂਟ ਤਕਸੀਮ ਕੀਤੇ ਗਏ ਅਤੇ ਰਚਨਾਵਾਂ ਪੇਸ਼ ਕਰਨ ਵਾਲ੍ਹੇ  ਵਿਦਿਆਰਥੀਆਂ ਨੂੰ ਸਨਮਾਨਿਤ ਕੀਤਾ ਗਿਆ।